En proclamándose ganador nel III Concursu de Ramos de Navidá na escuela, entamáu pola Estaya de la Llingua de la conceyalía de Normalización Llingüística d’Avilés, el C.P. Villalegre podrá disfrutar del so premiu, esti vienres, 31 de xineru, na biblioteca la escuela.
Trátase d’un cuentacuentos musical que xurde de la mestura del Dúo Amati (Ana Fernández y Ignancio Alonso) y l’escritor Aique Fernandi. El so proyeutu, Histories Sonores, xunta les sos grandes pasiones: la palabra escrita n’asturianu y la música.
Col títulu Un trasgu na Ciudá, los neños y neñes pasaránlo mui bien coles aventures de los seres mitolóxicos asturianos, que van camudar la natura pola ciudá en busca de la xente humano. Ellí, tarán nuna familia como cualquier otra. Los padres sedrán Xuan de la Borrina y la Xana; los fíos la Neña Barbuda y el Trasgu y los güelos el Nuberu y la Guaxa. Con estos ingredientes, la risa ta asegurada.
Con esta historia preténdese averar la mitoloxía asturiana a neños y neñes d’anguaño, tradicionalmente asociada al mediu rural. Y asina crear una esfera menos mística, más moderna y humorística.
