El III Concursu de Ramos de Navidá na escuela, entamáu pola Estaya de la Llingua de la conceyalía de Normalización Llingüística d’Avilés ente les escueles de la ciudá, que puxa pola conocencia y la recuperación de les tradiciones de la Navidá n’Asturies, yá tien ganador. Trátase del C.P. Villalegre.
El premiu consiste na representación d’un cuentacuentos, o un taller didáuticu nes propias instalaciones del centru, o bien un lote de llibros n’asturianu pa la biblioteca de la escuela, en casu de nun poder acoeer dalguna de les dos actividaes anteriores si nun se dispusiera del espaciu afayadizu pa ello.
El xuráu taba compuestu por Verónica Fueyo Alcedo, historiadora y esperta en cultura tradicional asturiana; Rosa Cuervo Jiménez, educadora infantil de l’asociación Aladanza Educación y Tradición, y Susana Sela Rodríguez, escritora y investigadora nos vezos y costumes de la tradición asturiana. Actuaba como secretaria, ensin voz nin votu, Montserrat Machicado Compañy, responsable de la Estaya de la Llingua.
Nel so fallu, destacaron la bona decoración del ramu, qu’incluyía elementos tradicionales, como les veles y les rosques, xunto col usu de colores naranxa y mariellu nuna mestura sele y bien prestosa de tradición y anovación.
